ලංකාවේ අලි ගැන වැඩිපුරම කතාකරන මාධ්යවේදියා - අසංක
ජාතික රූපවාහිනිය රජය හා සම්බන්ධ වගකීම අතින් ඉහළම මාධ්ය ආයතනයකි. ප්රවෘත්ති විකාශය එහි ප්රධානම සුවිශේෂීම අංගයකි. එහි ප්රවෘත්ති නිවේදනයට තේරීමත් සුවිශේෂීය. ඒ අතරින් රාත්රී 8 ප්රධාන ප්රවෘත්ති විකාශය කෙරෙහි විශේෂ අවධානයක් යොමු කළ යුතු බව නොකියාම බැරිය. රාත්රී 8 ප්රධාන ප්රවෘත්ති විකාශය ඉදිරිපත් කරන ප්රමුඛ පෙළේ නිවේදකයකු වන ඔහු අසංක නිලඟරත්නය.
බියංකා සමඟ වැඩිපුරම රාත්රී 8 ප්රධාන ප්රවෘත්ති විකාශය ගෙන එන ඔහු අසංක නිලඟරත්නයි. ඔහුත් අපේ කතාබහට එක්කර ගත්තා.
ජාතික රූපවාහිනියේ රාත්රී 8 ප්රධාන ප්රවෘත්ති විකාශයේදි බියංකත් එක්ක වැඩිපුරම කපල් වෙන්නෙ අසංක. කොහොමද ඒ වගකීම දැනෙන්නේ?
අපි නිතරම ඉන්නෙ වගකීම කියන බැම්මෙන් බැඳිලා. බියංකා කියන්නේ හොඳ දැනුමක්, අවබෝධයක් සහිත සහායකයෙක්. ප්රවෘත්ති විකාශයේ දී සත්ය හා නිවැරැදි බව වගේම රටේ ලෝකෙ තොරතුරු ගැනත් අපි අප්ඩේට් වෙන්න ඕන. නිවුස් රූම් එකෙන් ලැබෙන නිවුස් එක කියවගෙන යනවට වඩා ඒ ගැන අපිත් දැනුවත් වෙලා හිටියොත් අපිට ඒක වඩා විශ්වාසෙන් ඉදිරිපත් කරන්න පුළුවන්. මම ප්රවෘත්ති අංශයේ නිෂ්පාදකවරයෙක් විදිහටත් කටයුතු කරන නිසා ප්රවෘත්ති නිවේදනයේ දී ඒක මට පහසුවක්. ඊට අමතරව මං පාර්ලිමේන්තු වාර්තාකරණයෙත් යෙදෙනවා. ඒ වගේම කාර්යභාර සංස්කාරක කියන වගකීමත් දරනවා.
කොහොම ද එතකොට අසංක ප්රවෘත්ති නිවේදනයට සම්බන්ධ වෙන්නේ?
පොඩි කාලෙ ඉඳන්ම තිබුණෙ නිවේදකයෙක්, මාධ්යවේදියෙක් වෙන හීනයක්. රජරට සේවයේ වැඩසටහන්වලටත් ගියා. මූලික අධ්යාපනය හැදෑරුවේ කිරිමැටියාව මහා විද්යාලයෙන්. ඊට පස්සේ කුලියාපිටිය සාරනාත් මහ විද්යාලයට ඇතුළත් වුණා. ආරියරත්න ඇතුගල සර් ජාතික රූපවාහිනී සංස්ථාවේ සභාපතීත්වය දරපු කාලෙ රූපවාහිනී පර්යේෂණ හා පුහුණු ඒකකයේ රූපවාහිනි මාධ්ය පිළිබඳ ඩිප්ලෝමා පාඨමාලාවක් ආරම්භ කළා. ඒකට අයඳුම් කරලා තමයි රූපවාහිනියට අඩිය තිබ්බේ. ඔය අතරේ ගුවන්විදුලියේ සහන නිවේදකයෙක් විදිහටත් තේරුණා. පාඨමාලාව අවසන් වෙන කාලෙ රූපවාහිනි ප්රවෘත්ති අංශයේ කාර්ය මණ්ඩලයේ අඩුවක් නිසා අපෙන් ළමයි 6 දෙනෙක් තෝරගත්තා. ඒ අතරේ මාත් හිටියා. මුලින්ම ප්රවෘත්ති අංශයට. 2009 ඉඳන් පුහුණුවන නිෂ්පාදක සහකාරවරයෙක් විදිහටත් වැඩ කළා. ප්රවෘත්ති හඬකැවීම්වලට සහභාගි වුණා. ප්රවෘත්ති කියන්නත් ලොකු ආසාවක් තිබුණා. 2010 වසරේ එක දවසක ඇතුගල සර් කොරිඩෝ එකේදි හමුවෙලා මට කිව්වා අසංක ඔයාගෙ කටහඬ හොඳයි ස්ක්රීන් ටෙස්ට් එකක් කරල ගෙනත් පෙන්නන්න කියලා. ඒ විදිහට තමයි රූපවාහිනියට සම්බන්ධ වුණේ. 2010 අප්රේල් 15 තමයි පළමුවෙන්ම ප්රවෘත්ති ඉදිරිපත් කළ දවස.
නිවේදන කටයුතු කරල තිබුණත් ප්රවෘත්ති කියන්න වාඩි වුණාම ලොකු තිගැස්මක් ඇති වුණා. සත්යතාව, නිවැරැදිභාවය උපරිමයෙන්ම තිබිය යුතු වගකීම් සහගත ක්ෂේත්රයක් මේක. එදා ඒ දැනුණ තිගැස්ම තීම් එක ගහල එද්දි අදටත් මට දැනෙනවා.
එතකොට ඔබට රාත්රී 8 ප්රධාන ප්රවෘත්ති විකාශය ලැබෙන්නෙ කොහොමද?
ඒකත් අහම්බෙන් ලැබුණු අවස්ථාවක්. මට තිබුණෙ පැයෙන් පැය පුවත් සහ දවල් 12.30. දවසක් ප්රධාන ප්රවෘත්ති නිවේදක එන්න පරක්කු වුණා. පැය භාගයයි තිබුණේ. ඒ වෙද්දි මං 12.30 ඉවර වෙලා මැදිරියේ හිටියේ. ප්රවෘත්ති අධ්යක්ෂකගෙන් පණිවිඩයක් ලැබුණා අසංක ඉක්මනට ප්රධාන ප්රවෘත්ති විකාශය කරන්න ලේස්තිවෙන්න කියලා. මං ඉක්මනින් සූදානම් වෙලා මැදිරියට ගිහින් වාඩි වෙලා ඉන්නකොට විනාඩි දහයක් තියලා අදාළ නිවේදක ආවා. එදා ඔහුට ඉඩදීලා මං නැඟිටලා ආවා. තවත් දවසක් ඔය විදිහටම ප්රධාන ප්රවෘත්ති නිවේදකට එන්න බැරි වුණා. එදත් හිටපු ප්රවෘත්ති අධ්යක්ෂ කිව්වා අසංක ඉක්මනින් ලේස්තිවෙලා එන්න කියලා. එදා තමයි රාත්රී 8 ප්රධාන ප්රවෘත්ති විකාශය කරන්න අවස්ථාව ලැබුණේ. ඒ 2014 වසරේ. හදිසියේ වුණත් ඒ වගකීම හරියට කළ නිසා හිටපු ප්රවෘත්ති අධ්යක්ෂ නිශාන්ත උදේවංශ මහතාගේ මැදිහත් වීමෙන් ප්රධාන ප්රවෘත්ති රෝස්ටරේට මගෙ නමත් ඇතුළත් කළා.
එක දවසක් මං ප්රවෘත්ති විකාශය නිමාවෙලා ඩෝමැට්රි එකේ ඉද්දි ප්රවෘත්ති අධ්යක්ෂගෙන් කෝල් එකක් ආවා අසංක හදිසි බ්රේකිං නිව්ස් එකක් ඉක්මනට ඔයා එන්න කියලා. මං එවෙලෙ හිටියෙ කොට කලිසම පිටින්. කමක් නෑ මේක හදිසියි එන්න කිව්වා. මං කොට කලිසටම උඩින් ෂර්ට් එකයි, කෝට් එකයි දාගෙන ගිහින් නිව්ස් එක කිව්වා. ඒක තවත් විශේෂ වුණේ එදා කාර්ය මණ්ඩලයත් නෑ. කැමරාවට හිටියෙ ප්රවෘත්ති කැමරා ඒකකයේ ප්රධානියා. මැදිරි නිෂ්පාදක විදිහට හිටියේ නියෝජ්ය ප්රවෘත්ති අධ්යක්ෂ. ඒකට අදාළ කැසට් එක ප්ලේ කළේ නියෝජ්ය අධ්යක්ෂ ජෙනරාල් ප්රවෘත්ති. ඒක නම් කවදාවත් මට අමතක වෙන්නෙ නැති අත්දැකීමක්.
ඔබ බලාපොරොත්තු වුණු, හීන දැක්ක මාධ්යවේදියා ඔබ තුළින් මතුවුණා කියලා හිතනවද?
ඔව්. මම මගේ වෘත්තිය ගැන තෘප්තිමත්. මං ප්රතිපත්තියක් විදිහට තිරයේ පෙනී ඉන්නේ ප්රවෘත්ති හා කාලීන සිදුවීම් සම්බන්ධ වැඩසටහන්වලදී විතරයි. පාර්ලිමේන්තු වාර්තාකරණයේ දී පෙනී ඉන්නවා. මං විශ්වාස කරන දෙයක් තමයි ප්රවෘත්ති නිවේදකයෙක් ඒ හා සම්බන්ධ වැඩසටහන්වලට පමණක් සම්බන්ධ වුණා නම් හොඳයි කියන එක.
අසංක නිලඟරත්න කියන්නෙ අලි පිස්සෙක් කිව්වොත්?
පුංචි කාලෙ ඉඳන්ම මට ඒ ආසාව තිබුණා. රූපවාහිනියට ආවට පස්සෙත් අලි පිස්සුව එහෙමම තිබුණා. මං ප්රවෘත්ති නිෂ්පාදකවරයා විදිහට කටයුතු කළොත් අලි නිවුස් එකක් කරනවාමයි. ලංකාවෙ අලි ගැන වැඩිපුරම කතා කරන මාධ්යවේදියා මං වෙන්නත් ඇති. ඒක සංසාරගත බැඳීමක් වගේ.
වගකීම් සහිත රැකියාවක් කරද්දී සමීපතමයන්ගේ සහාය වගේම තේරුම් ගැනීමත් වැදගත් නේද?
අනිවාර්යයෙන්ම. මං විවාහ වෙලා පුංචි පුතෙක් ඉන්නවා. මගේ බිරිය හමුවුණෙත් ගුවන්විදුලි සංස්ථාවේ සහන නිවේදකයෙක් විදිහට තේරිලා ගුවන්විදුලි අභ්යාස ආයතනයේ ට්රේනිං කාලෙදි. එයා අයන්ති සමන්එළිය. එයාට මේ ෆීල්ඩ් එක ගැන හොඳ අවබෝධයක් තියෙනවා. ඒ නිසා මට මේ කටයුතු කරගන්න ලොකු සහායක්, සහනයක් එයාගෙන් ලැබෙනවා.
රාත්රී 8 ප්රවෘත්ති විකාශය වැඩි වාර ගණනක් ගෙන එන ඇය - බියංකා
නිවේදන කලාවත් විවිධ පැතිකඩ ඔස්සේ ගලායන්නකි. ප්රවෘත්ති නිවේදනය යනු එහි වගකීම් වැඩිම අංශයයි. ප්රවෘත්ති නිවේදනයට වාග් චාතූර්ය පමණක්ම සෑහෙන්නේ ද නැත. උචිත කටහඬ, රටේ ලෝකයේ තොරතුරු පිළිබඳ දැනුම්වත් බව මෙන්ම යාවත්කාලීන වීම ද අනිවාර්ය වේ. බියංකා ප්රේමසිරි සහ අසංක නිලඟරත්න යනු ශ්රී ලංකා රූපවාහිනී සංස්ථාවේ රාත්රී 8 ප්රධාන පුවත් විකාශයේ නිවේදක යුවලකි. පුවතේ සත්ය හා නිවැරැදි බව සොයමින් යන ගමනේ සොඳුරු අත්දැකීම් ගැන ඔවුන් හා කළ කතාබහයි මේ.
ජාතික රූපවාහිනියේ රාත්රී 8 ප්රධාන පුවත් විකාශයේ නිවේදක යුවළ අතරින් වැඩිපුරම කාන්තා පාර්ශවය නියෝජනය කරන්නේ බියංකා. ඒකට විශේෂ හේතුවක් තියේ ද?
සාමාන්යයෙන් ප්රධාන පුවත් විකාශය සිදුකෙරෙන්නේ දෙපාර්ශවයෙන් දෙන්නෙක්. ප්රවෘත්ති නිවේදිකාවන්ගේ හිඟය නිසා බොහෝ විට මට ඒ අවස්ථාව වැඩිපුර ලැබෙනවා.
ප්රවෘත්ති ඉදිරිපත් කරනව වගේම මං ප්රවෘත්ති අංශයේ සහකාර නිෂ්පාදිකාවක් විදිහටත් කටයුතු කරන අතරතුර උදෑසන ලෝක ප්රවෘත්ති ගැන කියවෙන සිව් දෙස වැඩසටහනත් කරනවා. ඊට අමතරව කවරේජ්වලටත් යනවා. මේ හැම කටයුත්තක්ම වගකීම කියන හුයෙන් බැඳිලා තියෙන්නේ.
මහජනතාව ඉදිරියේ සත්ය හා නිවැරැදි භාවය තහවුරු කිරීමට ඔබ බැඳී ඉන්නවා. ඔබ අයිති රජයේ මාධ්ය ආයතනයකට. කොහොමද ඔබට ඒ සඳහා අවස්ථාව ලැබෙන්නේ?
මං මූලික අධ්යාපනය ලැබුවේ ඕපනායක විද්යාකර මහාවිද්යාලයෙන්. උසස් අධ්යාපනය සඳහා රත්නපුර සුමනා බාලිකාවට ඇතුළත් වුණා. එහි පාසල් ජනමාධ්ය සංගමයේ සභාපති වුණා. විද්යාකර විදුහලේ නියෝජ්ය විදුහල්පති සුනිල් රාජපක්ෂ සර් ළමා නිවේදක නිවේදිකාවන් බඳවා ගැනීමේ සම්මුඛ පරීක්ෂණයක් සඳහා මගේ ඇප්ලිකේෂන් එකක් දාල තිබුණා ශ්රී ලංකා රූපවාහිනී සංස්ථාවට. ඒ ඉන්ටවිව් එකෙන් මාව තේරුණා. ඒ වෙද්දි මං සා/පෙළ පන්තියේ. ළමා නිවේදිකාවක් විදිහට එහි සති අන්තයේ දසත ළමා පුවත් ඉදිරිපත් කිරීමේ අවස්ථාව ලැබුණා. පිටපතක් රචනා කරන තැන ඉඳන් ප්රවෘත්ති හඬ කැවීම දක්වා සියලු පියවර එහිදී කියල දුන්නා. විභාග ළං වෙද්දි ගෙදර ඉඳන් ඔන් කැමරා රෙකෝඩින් එව්වා. මට මතකයි මුල්ම එක කළේ ඇහැළේපොල වලව්ව ගැන.
2012න් පස්සේ රූපවාහිනී අභ්යාස ආයතනයේ ටීවී ප්රසන්ටින් සහ ප්රවෘත්ති නිවේදනය පිළිබඳ කෝස් එකකට සම්බන්ධ වුණා. ටීවී ඇඩ් එකකට අනුව අයදුම් කරලා වට තුනක සම්මුඛ පරීක්ෂණයකින් සමත්වෙලා තමයි ප්රවෘත්ති නිවේදන අංශයට මාව තේරුණේ. ඒත් මගේ ආසාව තිබුණේ වැඩසටහන් ඉදිරිපත් කරන්නියක් වෙන්න. මගේ කටහඬේ විශේෂත්වය නිසා විනිශ්චය මණ්ඩලයේ තේරීම වුණේ ප්රවෘත්ති නිවේදනයට. ඔය අතරේ විද්යා පීඨයට තේරුණත් මං වැඩිපුර කැමැති වුණේ මීඩියා ෆීල්ඩ් එකට. 2014 නිදහස් මාධ්යවේදිනියක් විදිහට ප්රවෘත්ති අංශයට බැඳුණු මං 2019 වෙද්දි ස්ථිර සහාය නිෂ්පාදකවරියක් වුණා. කැලණිය විශ්වවිද්යාලයේ බාහිර උපාධිය හදාරලා සුදුසුකම් සපුරාගත් නිසා විද්යා පීඨ ගියේ නෑ කියලා පසුතැවීමක් දැනිලා නෑ.
ඔබ ගොඩක් කැමැත්තෙන් හිටියේ වැඩසටහන් ඉදිරිපත් කරන්නියක් වෙන්න. ඒත් දෛවය ඔබ යොමුකළේ වගකීම් සහිත තැනකට. ඒ ගැන මොකද හිතෙන්නේ?
ඔව්. මං ගොඩක්ම ආස වුණේ වැඩසටහන් ඉදිරිපත් කරන්න. දේශපාලන වැඩසටහන් ඉදිරිපත් කරන්න තමයි වැඩිපුරම ආස. ඒත් තවමත් මට ඒ සඳහා අවස්ථාවක් ලැබුණෙ නෑ. 2010 තිබුණු පළවෙනි යොවුන් පාර්ලිමේන්තු මැතිවරණයේ සුමන බාලිකා යෞවන සමාජය නියෝජනය කරමින් ඉදිරිපත් වෙලා ලංකාවෙන්ම වැඩිම වෝට්ස් ගත්තෙ මං. ඒ නිසා එංගලන්තයේ ගිහින් එහි පැවැත්වුණු එංගලන්ත - ශ්රී ලංකා තරුණ හුවමාරු වැඩසටහනේ දී ශ්රී ලංකාව ගැන කතා කරන්න අවස්ථාවක් ලැබුණා.
ඔව්. ඒ 2014 මාර්තු මාසෙ දවසක්. 7.55 නිවුස් එකක් තමයි කියන්න ලැබුණේ. දේශීය පුවතක්, විදේශීය පුවතක් සහ ක්රීඩා පුවතක් එහි අන්තර්ගත වෙලා තිබුණා. අපිට ඒ ගැන ට්රේනිං එකක් දීල තිබුණත් ඒක පුදුම විදිහට ටෙන්ෂන් වුණු මොහොතක්. මගේ බුලටිං ප්රොඩියුසර් විදිහට හිටියේ චමින්ද ගුණරත්න අයියා. එයා තමයි ප්රධාන පාලක මැදිරිය එක්ක සම්බන්ධ වෙලා නිව්ස් එක ඩිලිවර් කරන්නේ. නිවුස් රූම් එකේ ඉන්න ප්රොඩියුසර්ස්ල නිව්ස් හදල දුන්නට නිවුස් රීඩර් එක්ක සම්බන්ධ වෙලා නිවුස් එක විකාශය කිරීමේ වගකීම තියෙන්නේ බුලටිං ප්රොඩියුසර්ට. මාත් අද ඒ කර්තව්යයේම නියැළෙන්නියක් වීම ගැන ගොඩක් සතුටුයි.
මේ වගකීම් සහිත ගමනේදි අමතක නොවන සිදුවීම් එහෙමත් ඇති?
මං මුලින්ම නිව්ස් කියන්න ගිය දවසෙ තමයි මේ සිදුවීමත් වුණේ. ඒ දවස්වල කාලගුණ වාර්තාව ඉදිරිපත් කරද්දී කාලගුණ විද්යා දෙපාර්තමේන්තුවේ නිලධාරියෙක් සම්බන්ධ කරගන්නවා. කලින් සූදානම් කරගෙන හිටියත් මොකක් හරි තාක්ෂණික දෝෂයක් නිසා අදාළ නිලධාරිනියට එදා සම්බන්ධ වෙන්න බැරි වුණා. දැන් බුලටිං ප්රොඩියුසර් විදිහට හිටිය චමින්ද අයියා මට කියනවා නංගි නිලධාරිනිය සම්බන්ධ වෙන්නෙ නෑ, ඔයා ඊළඟ එකට යන්න කියලා. ඒක කාටවත් නොදැනෙන්න කොහොමහරි මට කරගන්න පුළුවන් වුණා. මං නිව්ස් එක කියලා එළියට එද්දි චමින්ද අයියා කිව්වා ඔයා ඒක ගානට බැලන්ස් කළා ගොඩක් හොඳයි නංගි කියලා. ඒ වගේ පරිණත කෙනෙක්ගෙන් ඒ වගේ වචනයක් අහන්න ලැබුණු එක මට ජීවිතේ අමතක වෙන්නෑ. ඒ වගේම මට මුලින්ම සජීවී වැඩසටහනක් ඉදිරිපත් කරන්න ලැබුණු දවසත් අමතක වෙන්නෑ. ඒක සිරි ලක සිරි අවුරුදු සිරි කියලා අවුරුදු උත්සවයක්. ආධුනිකයෙක් විදිහට එතනදි මං ගැන විශ්වාසය තියලා ලොකු රිස්ක් එකක් අරගෙන මාව ඒ සඳහා යෙදෙව්වේ නිශාන්ත උදයංග සර්. ඒක සිහිපත් කළ යුතුමයි. ඒකෙ මට පොඩි පොඩි සෙග්මන්ට් කරන්න තිබුණේ. අසේල බණ්ඩාරනායක අයියා වතුරේ බැහැගෙන කොට්ට පොර තරගයක් නිවේදනය කරමින් හිටියේ. මාව දැක්ක ගමන් මොනාද බියංකා ගොඩක වෙලා ඉන්නේ ඔයත් එන්නකො වතුරට කිව්වා. මාත් දෙවරක් නොසිතාම ඇඳන් හිටපු ඇඳුම් පිටින්ම කර ළඟට වතුරට බැහැලා එදා ඒ වැඩසටහන ඉදිරිපත් කළා. හැමෝගෙන්ම හොඳ ප්රතිචාර ලැබුණා. ඒ වගේම තමයි පාස්කු ප්රහාරය දවසේ හදිසි බ්රේකිං නිව්ස් එකක් කියන්න සිද්ධ වුණේ ඒ ගැන කිසිම දැනුවත් වීමක් නැතුව, ඇඳන් ඉන්න ඇඳුමට උඩින් බ්රේසර් එක දාගෙන. කොහොමහරි මුළු දවසම කිසිම අවුලක් නැතුව කරගෙන ගියා. ඒ වගේ ගොඩක් අත්දැකීම් තියෙනවා.
ඒ සහයෝගය නම් ගොඩක්ම වැදගත් වෙනවා. සමහර විට අපි එක නිවුස් එක බෙදාගෙන කියන අවස්ථා තියෙනවා. එතනදි දෙන්නගෙ සන්නිවේදනය මත තමයි ඒක සිදුවෙන්නේ. හදිසි අපහසුතාවකදි වුණත් පාට්නර්ගේ අන්යෝන්ය බැඳීම ගොඩක් වටිනවා. බොහෝ දෙනෙක්ගේ ඒ සහාය ලැබෙනවා. අසංක අයියයි මායි නිතර එකට වැටෙන නිසා අපි අතර හොඳ අවබෝධයක් තියෙනවා. ඒක ලොකු පහසුවක්.
ඔබ විවාහකයි. භාරදූර කර්තව්යයක් කරද්දී ඒ සහයෝගය ගැනත් සඳහන් කරමු?
මගෙ තාත්තගේ කැමැත්ත අනුව තමයි කවදාහරි මට විවාහ වෙන්න නියම වෙලා තිබුණේ. ඒ නිසා මං කා එක්කවත් සම්බන්ධයක් ඇතිකර ගත්තෙ නෑ. එයා දිමුතු වීරකෝන් බණ්ඩාර. ඇත්තටම කිව්වොත් සංසාරගත බැඳීමටකට ලැබුණු හස්බන්ඩ් කෙනෙක්. එයාගෙ අම්මත් කවදාවත් මට නැන්දම්මා කෙනෙක් වුණේ නෑ. එයාලගෙ සහාය නිසා තමයි අද මං මේ විදිහට හිනාවෙලා රූපවාහිනී තිරය ඉදිරියේ වගකීමක් දරන්නේ. මං යම්කිසි සාර්ථකත්වයක ඉන්නව නම් අනිවාර්යයෙන්ම ඒ එයාලගෙන් ලැබෙන සහාය නිසා.
නාමලී ගමගේ
